CLICK HERE FOR THOUSANDS OF FREE BLOGGER TEMPLATES »

الأحد، ١٤ أكتوبر ٢٠٠٧

الناس ليه كده



فى الاول برحب بالجميع وانا سعيده جدا انى هبقى ان شاء الله واحده منكم
هتكلم فى موضوع قارفنى جدا وحارق دمى
وهو ليه الناس وحشه

انا عايزة كل واحد يدخل ده ول دخل حد اصلا يقولى من رايه الخاص ليه الناس بقت بالوحاشه دى
انا عمرى ماشوفت واحد بيتعامل مع التانى بحب لمجرد انه بيحبه
لازم نفاق وكذب وخداع علشان يبقى انسان
والله حرام اللى بيحصل ده وغير كده احنا فى وقت حرب تفتكروا لما امريكا تلاقى ان مفيش بلد واحده رايحه تدافع على العراق
يبقى ليها الحق تفكر انها تستولى على العالم العربى طبعا لانه واللهم لاحسد مالوش دعوه بحد كل دوله بتقول نفسى نفسى نفسى نفسى
انا روحت لموضوع تانى بس برضه بيبين قد ايه الانسان طماع وانانى ووحش
يعنى لو انت عراقى او فلسطينى ولقيت اختك ابوك امك اختك بيموتوا قدامك بامانه الله ايه هيبقى احساسك
او شوفت اختك بتغتصب قدامك من كلب امريكى او كلب اسرائيلى
انا اسفه انى بقول الكلام ده بس دى حقيقه
هتكره العرب لانهم قادرين يعملوا حاجه وواقفين ساكتين
يبقى من الاخر وداعا يا إنسانيه وداعا يارجوله وداعا ياشهامه وداعا ياعرب
وفى النهايه احب افكر كل عربى ان الدور على اى بلد ممكن تكون بلدى او بلدك
وساعتها هنبقى مطاردين ومش لاقيين مكان نعيش فيه
ياريت يبقى قلبنا على بعض
دلوقتى العربى بيقتل العربى المصرى بيقتل المصرى والله حرام
احنا عايزين نبقى ايد واحده مش نخلص على بعض
انا اسفه لو كلامى ضايق اى حد

17 التعليقات:

غير معرف يقول...

هاي دينا

سعيده اني اكون اول تعليق في مدونتك الجديده

مش عارفه ابتدي منين بس احب اقولك كل سنه و انتي طيبه و محققه كل امنياتك

بشكرك علي تشريفك ليا و مبروك علي بدايه دخولك عالم التدوين و ربنا يوفقك فيه و في اي مجال و في كل مجال و انشاء الله تثبتي وجودك

موضوعك مهم يادينا لأنه نفس السؤال بطرحه دايما بس زي مافيه ناس وحشه يادينا صدقيني فيه ناس حلوه ممكن يكونوا قليلين اوي و مش سهل نقابلهم في حياتنا

بس انتي عارفه يادينا الاطماع الشخصيه سبب من اسباب ان النفوس تكون مش كويسه و الناس تشيل من بعض

ممكن نقابل ناس ناجحين في حياتنا و نكون بنتمني من جوانا نبقي زيهم و احسن منهم كمان بس فيه فرق فعلا بين الحقد و الطموح

بين اني نفسي اكون احسن دايما و بين اني اعمل مكايد في الناس و اوقع بينهم عشان اوصل

المشكله كمان يادينا ان اللي بيعمل حاجه غلط بيكون مصر عليه و مش متخيل ان اللي بيعمله غلط و بيكون مقتنع ان من حقه انه يعمل اي حاجه عشان يوصل لغرضه و ده الخطأ بعينه

مش معني اني عايزه انجح اعض في غيري حيبقي ايه طعمه النجاح ؟

اهم حاجه زي ماقلتي ان ايدينا تكون في ايدين بعض و نخاف علي بعض

الاخلاص يادينا للأسف بقه عمله نادره الوجود

بتمنالك التوفيق و ان ربنا يرزقك دايما بأصدقاء اوفياء و بتمني ماكونش ضيفه تقيله علي قلبك و ثقياني حكون من متابعينك الدائمين و كل سنه و انتي طيبه و عيد مبارك ليكي و لكل من تحبي

تحياتي لك

غير معرف يقول...

اسفه دينا خطأ املائي غير مقصود في نهايه تعليقي السابق
تحياتي لكي

Heart Beat يقول...

اولا الف مبروك على المدونة

و اهلا بيكي في عالم التدوين

كل سنة و انتي طيبة رغم انها جت متأخر شوية يعني

انا حبيت بس اهنيكي على المدونة و اقولك كل سنة و انتي طيبة

و هارجع اناقشك في الموضوع اللي انتي كاتباه لانه موضوع جميل و انا تستهويني النوعية دي من النقاشات

ياسر شمس الدين يقول...

السبب
هو غياب اخلاقنا ودينا عن سلوكياتنا يعنى ممكن تلاقى واحد بيصلى بس سلوكة مختلف احنا عايزين نطبق دينا فى معاملاتنا مع بعض لان الدين المعاملة هى ديه المشكلة اللى مخليه الناس تقطع فى بعض بجانب
الاشياء الاخرى المتعمده من جانب الحكومات التى تثير الفتن فى المجتمعات حتى يستقر لها الملك والحكم

dina يقول...

اجندا حمرا
اولا انا سعيده جدا بوجودك لانه شرف كبير ليا
كلامك كله انا متفقه معاكى فيه
بس تعرفى الناس القليلين دول اللى هما كويسين بكرة يبقوا وحشين برضه لان استحاله الغزال يعيش مع الاسد فى سلام

dina يقول...

Heart Beat
سعيده جدا بوجودك
وانا معجبه جدا جدا جدا جدا بيكى وكل اللى بتكتبيه بيعجبنى ودى والله مش مجامله
انا متابعه مدونتك من زمان
وانا فى انتظار المناقشه
سلام

dina يقول...

ياسر شمس الدين
شوف يا استاذ ياسر كلامك كله جميل وفعلا لو اتنفذ كل حاجه هتتصلح
لكن الانانيه دى طبيعه النفس البشريه
وانا من الناس اللى بتعتقد ان الانسان لو فطرته الانانيه من الصعب يغيرها
وطبعا فى الاول وفى الاخر ربنا سبحانه وتعالى قادر على كل شئ
يعنى من الاخر احنا محتاجين معجزة من عند الله سبحانه وتعالى
سلام

كلام من القلب يقول...

ازيك يادينا دي اول مرة ليا عندك وانا سعيدة جدا اني بدري مش متأخر فىاول بوست ليكي
كل سنة وانتي طيبة وعيد سعيد عليكي يارب

اول بوست ليكي جميل جدا بيناقش قضية مهمة اوي
ليه الناس بقت وحشة ده سؤال صعب اوي
لان الوحش ونكران الجميل والخداع والخيانة بقى شيء طبيعي جدا جدا

المفروض دلوقتي لو لاقيتي حد كويس وحتلاقي الناس بتقوله ايه ياعم انت مش عايش معانا ولاايه ويعملوا زي محمد صبحي فى وجهة نظر (انت مش معانا ولاايه ياشيخ عبد التواب ههههه)

اما بقى ان العرب سايبين ده يحصل فى العراق ده اسمه جبن لا اكتر ولااقل وكمان اسمه قلة نخوة لألألألألأ مش قلة مفيش اصلا معدومة

بس اقولك على حاجة يادينا انتي لاقيتي خناقة قدامك جامدة اوي واللى بيتخانق ده قالك لو ادخلتي حموتك تفتكري حتدخلي ؟؟؟؟؟؟
طيب لو لاقيتي حرامي ماسك مطوة وشايفة في عينيه انه حيسرق واحدة قاعدة قدامك تفتكري حتنبهيها ؟؟
خلي بالك المثالين دول لناس ماتعرفهمش ولا يهموكي

طيب لو يهموكي بقى يعني حد من اهلك بيحصله كده تفتكري تصرفك حيختلف ؟؟

انا عن نفسي يادينا عشان ابقى صادقة معاكي معرفش لو حد غريب حعمل ايه ممكن اوقلك لا حدافع واموت وخليني اموت شهيدة واعمل نفسي سبع رجالة عشان ابان قدامك وقدام كل الناس اني كويس ولما يجي الموقف ده اجري
اما لو كان حد من اهلي فااعتقد ان تصرفي حيبقى مختلف
واقولك على حاجة انااتعرضت للمثال التاني ده واتصرفت تصرف ايجابي طبعا لأن الانسانة اللى كانت قدامي كانت تهمني اوي

فى مثل احنا بنقوله بس دي حقيقة بنسبة 99%
ان جالك الطوفان حط ولدك تحت رجليك

فشوفي بقى لما ام او اب يحطوا عيالهم تحت رجلهم يبقى اي حد تاني ممكن يعملوا ايه معاهم
وعاتقد ان كل البلاد العربية بطبق المثل ده
ومثل كمان عيش ندل تموت مستور
والجري نص الجدعنة

ايه رايك فيا بقى وانا قلبتلك المكان هناامثال وكأننا قاعدين على المصطبة هههههههههه

اتمنى اني اكون مخرجتش برا الموضوع واني اكون جوابت على اللى انتي عيزاه اصل انا برغي كتير وفي الاخر اسأل نفسي هوانا جاوبت ولا لسة ؟؟؟؟

انااسفة على التطويل يافندم
والف الف مبروك على البلوج الجديد
تحياتي ليكي ياجميل

غير معرف يقول...

عزيزتي دينا

يافندم الشرف ليا

مرسي علي ذوقك و كلامك الرقيق

معلش كنت عايزه اعلق علي جزئيه ذكرتيها في تعليقك

الناس الكويسين القليلين دول بكره يبقوا وحشين

امبارح كنت بتفرج في التليفزيون علي برنامج كانوا مستضيفين فيه لو كنتي شوفتي مسلسل قضيه رأي عام
هشام واحد من المتهمين كانوا مستضفين الممثل اللي ادي الدور و اللي ادت دور سميحه و كانوا بيتكلموا في المسلسل

و الصراحه ان جيتي للحق فيه حبه حاجات قالوها مااقتنعتش بيها و قلت ازاي يطلعوا يقولوا كده في التليفزيون

بصي ياستي
الممثل اللي ادي شخصيه هشام كان بيقول ان الناس كلها عندها قابليه للأغتصاب

لكن ممكن يعني حد منهم يمنعوا جزء خير لسه جواه

ده ظلم و غلط اننا نعمم و نقول الناس كلها عندها قابليه الاغتصاب ده كأنه بيقول اننا بقينا خلاص عايشين وسط وحوش مش بني ادمين
و مره واحده صاحبتي برضه قالتلي ان كل واحد خاين بطبعه لكن اللي مش بيخون لسه ماجاتلوش الفرصه لكده و ده برضه انا ماتفقتش معاها فيه لأن مش كل الناس خاينه ومش سبب ان الناس مش خاينه عشان ماجاتلهاش فرصه تخون اللي بتحبه

برضه لما اتكلم مع الممثله اللي ادت شخصيه سميحه و دي كانت اللي حامل في المسلسل و تم اغتصابها بطريقه وحشيه قالت ايه بقه؟قالتلك اي واحد عاقل حيشوف تلاته قدامه واحده منهم حامل يقول لنفسه اروح للأتنين التانيين و اسيب الحامل؟برضه اتعصبت من كلامها لأن هي كده بتقول انهم عاقلين و لا ايه؟و بتبرر فعلتهم ؟

جريمه الاغتصاب مالهاش اي مبرر لأنها تعدي علي حريه الغير

اسفه معلش طولت عليكي بس حبيت اقولك ان صدقيني يادينا الكويس حتي لو نادر الوجود في الدنيا دي وعنده اسس ثابته اتربي عليها و عاش بيها حيفضل كويس حتي لو حواليه ناس وحشين زي الانسان الأمين كده حتي لو الكل حواليه حراميه عمره ماحيسرق حتي لو محتاج و يقول ربنا يغنيني بالحلال
صدقيني مش بحاول اكون مصلحه اجتماعيه بس انا بقول حاجات انا مؤمنه بيها
تحياتي ليكي و معذره للأطاله

dina يقول...

كلام من القلب
فى الاول انا سعيده جدا بوجودك شرفتينى ونورتى
بصى بقى ياسيتى بالنسبه للمثالين اللى قولتيهم
انا بخاف جدا
من خيالى
لكن فى نفس الوقت بحب اساعد
يعنى لو لقيت واحد بيسرق واحده ممكن اصرخ او احدفه باى حاجه بس اروح انا لوحدى اضربه مثلا ابقى كذابه لو قولت اعمل كده
لو واحد من اهلى هيبقى نفس التصرف لان والله انا عندى الناس كلها اهلى وبتعامل معاهم زى مابتعامل مع امى مش دى قصتنا
بس انا بنت وعلى الاساس ده اتكلمت
لكن لما اكون راجل ماشى فى الشارع شايف واحد بيسرق واحده وامشى زى العبيط ما احاولش حتى اساعد دى تبقى المصيبه
بس انا عن نفسى زى ماقولت لك هعمل اللى عليا لكن العيب على اللى بيمشى ومايبصش وراه
ودول اللى انا اقصدهم
وبعدين ايه اسفه دى بلاش تتاسفى تانى
انتى تطولى وتقصرى براحتك هههههههه
انتى براحتك على الاخر كفايه انك موجوده
سلام

dina يقول...

اجندا حمرا
بصى انا لما قولت ان الناس كلها هتبقى وحشه مع الزمن او بمرور الوقت
كلام مش محتاج تفكير
يعنى انا لما اكون عايش وسط ناس بتسرق وتنهب وتقتل
عايزانى اطلع محاميه
لا طبعا هبقى زيهم
وانا معاكى ان لسه فى ناس جواهم خير وحب وعطاء
بس فى نادرا جدا لما تلاقى حد منهم
ممكن تعيشى عمرك كله ماتقابليش الا واحده منهم
وممكن ماتلاقيش خالص
انا نفسى اعرف ليه كلنا مانحبش بعض وتبقى قلوبنا على بعض ساعتها هنبقى فى راحه اكتر
وبالنسبه للمثل المتخلف ده ربنا يشفى
على فكرة انا مش هتكلم كتير فى الاغتصاب لانى بكره السيرة دى لانها بتاكد لى ان فى كلاب ووحوش عايشين فى هيئه بشر
سلام

Heart Beat يقول...

عزيزتي دينا

انا معاكي ان في ناس كتيرة بقت وحشة الايام دي حاجه كده زي الوباء بدا ينتشر بين الناس و ربنا يستر علينا منه

بس برضه ده مش معناه انه مافيش ناس كويسه بالعكس في ناس كويسه لسه و الا كان حصل اختلال في نظام الكون من زمان و بقى على الدنيا السلام

اذا كنا ما قابلناش ناس بالشكل ده مش معناه انهم مش موجودين بمعنى عدم رؤيتنا للشيء لا تعني بالضرورة انعدامه

يبقى ندعي و نقول ربنا يؤزقنا بالناس الكويسة دي و يبعد عننا الناس الانانية و الكذابة اصل دول بقى في منهم كتير اوي يعني ممكن يتكتب فيهم موضوع كامل عنهم و عن اساليبهم الوضيعة في الوصول لاغراضهم

نيجي للحزئية السياسية في موضوعك طبعا احنا مش في حالة حرب و لا حاجه هوني على نفسك و ربنا يكفينا شر الحرب و اللي بيحصل فيها

اللي في حالة حرب هما ناس جابوا لنفسهم الحرب لغاية عندهم يعني هافكرك بحاجه صغيرة حصلت في الحرب العالمية التانية على ارض مصر في العالمين الارض المصرية اللي شاركت في الحرب دي و اللي تواجدت فيها القوات الايطالية بقيادة روميل

مصر ايمها وقفت جنب القوات الايطالية دي و سمحت ليهم بإستخدام الجزء ده من ارض مصر و اللي زرعه في الغام لغاية دلوقتي مش عارفين نخلص منها

الشعب المصري ايامها لما القوات الايطالية عرضت علينا تخليصنا من البريطانيين الشعب المصري رفض و قال لأ احنا عارفين كويس اوي نعمل ايه و نحمي بلدنا ازاي

مش قالوا لهم يا اهلا وسهلا و فتحوا ابواب مصر ليهم يدخلوا براحتهم و يعيشوا كمان معاهم قالوا بكل بساطة لأ متشكرين جدا و مع الف سلامة مش عايزين خدمات من حد

لكن اللي حصل بقى في العراق عكس كده تماما

جم ناس قالوا لهم انتم صعبانين علينا احنا هانساعدكم و ندخل بلدكم نخلصكم من حكم الرئيس صدام عشان تعيشوا في حرية

راحوا موافقين على طول و طبعا مستحيل ننسى الاستقبال الحافل بالورود و الافراح و اطلاق الاعيرة النارية احتفالا بدخول جيش اجنبي بلادهم

كلنا شوفنا المظاهر الاحتفالية دي على قنوات الاخبار المختلفة

شوفتي الفرق بين الموقفين اهم دول دولتين عربيتين اتعاملوا بإسلوب مختلف في نفس الموقف

ازاي بقى اروح انا انقذ واحد هو اللي دخل الحرامي بيته و عمله فرح استقبله فيه اودام العالم كله و لما الحرامي ده بدأ يتعدى على حرمة بيته برضه ماقالش الحقوني بالعكس ده السيد رئيس الوزراء العراقي بيقول لنا ماحدش يدخل في اللي بيحصل في العراق

ده لسه حتى قايل ان اي تعدي على الاراضي العراقية من الدول المجاورة ستعتبره الحكومة العراقية تعدي على سيادة و امن العراق و سوف يرد عليه

طيب روح خرج الجيش اللي محتل بلادك الاول و بعدين هدد و قول خطب زي ما انت عايز

اما بقى عن فلسطين فده تاريخ قديم جدا من ايام سيدنا موسى عليه السلام و بني اسرائيل و الاية الكريمة بسم الله الرحمن الرحيم

ووعدناهم الجانب الايمن من الطور

صدق الله العظيم

شوفتي خليتيني اتكلم كتير في السياسة و انا واخده اجازة منها في العيد ده لاني طول ما انا في الشغل ماعنديش غيرها

ربنا يسعدك يارب و يبعد عنك اي ناس وحشة قلبهم في انانية و حقد

dina يقول...

عزيزتى هارت بيت
انتى باختصار قولتى اللى انا عايزة اقوله
يعنى لو العراق كانت لقت دوله عربيه تساعدها كانت هتقول لها لا متشكرين
انا لو بغرق وواحد يهودى مد لى ايده هعمل ايه
همسكها طبعا
انا بتكلم ان العرب كانوا شايفين اللى بيعمله صدام ومفيش حد فكر فى المساعده والناس اللى بتتظلم دى
لما لقوا ان فى حد هيساعدهم فرحوا ورحبوا بيه مش مهم هو مين بس الناس عايزة تخلص
ليه مانبقاش احنا اللى بنحاول نخفف على بعض ونحب بعض
ولا لازم تعاون اجنبى
؟

Heart Beat يقول...

عزيزتي دينا

تعرفي ان بعد كل اللي حصل في الدول العربية من التدخل الاجنبي لازلنا بنطلب منهم المشورة و العون في كل حاجه

يعني احنا كعرب ماعندناش اكتفاء ذاتي حتى في مجرد مساعدة بعض

و طبعا لو تتذكري ان كان اتفاقية تعاون بين العراق و مصر و اليمن و فلسطين قبل الغزو العراقي للكويت

و تقريبا الدول العربية وقفن ضد صدام ماعدا دولة او اتنين من العرب للاسف واحدة منهم لغاية دلوقتي بتنادي بقيام دولة مستقلة ليها

و لو كان حد من العراقيين اشتكى للعرب يمكن كانوا اتحركوا الله اعلم بس للاسف هما لا قالوا للتدخل الاجنبي يتدخل و لا حتى للعرب يتدخلوا

الا بقى لو كان فيه طلبة معونة عسكرية سري من العراقيين طلبوه من الاجانب

و يبقى ساعتها مين اللي باع بلده

dina يقول...

تعرفى هارت بيت
احنا كعرب محتاجين معجزة من عند ربنا
علشان نبقى ولو ربع دوله اجنبيه
والله اللى احنا فيه مفيش حد يقدر يوصفه

Dust يقول...

مرحب دينا
الانسان كائن حي الشي الوحيد اللي بفصله عن الحيوان انه فيه يختار
بعرف الخطأمن الصح
يعني لما تقابلي او تعرفي انه انسان عمل شي وحش(وعمليا اكيد هيك بتعرفي انه الانسان وحش او لا من اعماله)ساعتها كوني اكيدة انه العمل الوحش هاد عمله بأختيارة وبكامل عقلة
ساعتها عندك انتي الاختيار
تتحملي غلطته او تسامحية وتكوني جاهزة وتوقعة بكل مرة تسمعي الاسم نفسه انه يكون عاملة عملة وحشة جديدة
مبروك المدونة :)

دنيا يقول...

حرك شجون القلب و احضر ربيعه ,,,,,

يا مرحبا بالي يراسل على ذوق ,,,,,,,,,,

ما انسى محبيني لو الوقت بيه عوق ,,,,,

وراعي الوفا نشريه ما حنا نبيعه ,,,,,,

ابشر بعزك لو تبي النجم من فوق ,,,

تامر على روحي وهي لك مطيعه"





تحيات لكى اختى دنياااااا انا اخوكى ناصر